“Ягамосьць”: вершы-прысьвячэньні Анатолю Сысу

“Ягамосьць” – так марыў назваць сваю кнігу вершаў Анатоль Сыс… У анталогіі паэтычных прысьвячэньняў увасоблена задуманае Анатолем Сысам, а зьдзейсьненае ягонымі сябрамі і паплечнікамі… Кніга паэтычных прысьвячэньняў “Ягамосьць” – сьціплы ўнёсак у скарбонку памяці выдатнага паэта сучаснасьці Анатоля Сыса. Тут творы, напісаныя тымі, хто асабіста ведаў Анатоля, і тых, хто быў знаёмы з ім завочна выключна праз яго творчасць. Тут творы вядомых, прызнаных аўтараў і пачаткоўцаў, якія робяць першыя крокі ў літаратуры, і якім творчасць і асоба Анатоля Сыса з’яўляецца сімвалам.

Выхад зборніка быў прымеркаваны да пяцідзесяцігадовага юбілея паэта. Я выступіў у ролі ўкладальніка кнігі. Цяпер вось шкадую, што было мала часу і многія цікавыя творы не змог тады своечасова адшукаць. Як, напрыклад, верш-прысвячэнне Сысу Рыгора Барадуліна.

ЯК ВІР…

Паэт, як вір,

Ад хвалявання стыне,

На дне хаваючы халодны клёк.

З гародчыка расчульвання

Юргіня

Юрыць паэтаў юр,

Як неўзнарок.

Паэт, як вір,

Віруе ды шчыруе,

Перамывае родных словаў

Жвір,

З Пегаса збрую

Скідвае старую,

Бярэтку поўні

Збіўшы набакір.

Паэт, як вір,

Супернік неспакою,

Капрызны хрэснік

Шчырай Каляды.

З Сусвету,

Як з цяснюткага пакоя,

Ірваецца вымкнуцца.

Але куды?

Уся кніга тут: Jagamoscj-1